जनकपुरधाम, चैत ७ गते ।
मधेश प्रदेशको गृह, सञ्चार तथा कानुन मन्त्री सरोज कुमार यादवले सुराकी खर्च नलिने निर्णय गरेका छन् ।
मंगलबार गृह, सञ्चार तथा कानुन मन्त्रालयको समेत जिम्मेवारी सम्हालेका भौतिक पूर्वाधारमन्त्री यादवले आफसँगै मन्त्रालयका कुनैपनि अधिकारीले सुराकी खर्च नलिने निर्णय गरेका हुन् । यो निर्णय मन्त्रीपरिषदमा लगेर पारित गराउने पदभाग ग्रहणको क्रममा उनले बताए ।
सुराकी खर्चको नाउमा गृहमन्त्री, सचिव, राज्यमन्त्री र मुख्यमन्त्रीले गरि मधेश सरकार स्थापना कालदेखि अहिलेसम्म मनोमानी रुपमा १ करोड ४२ लाख ८९ हजार ६ सय ६६ रुपैयाँ बुझेको विवरण सार्वजनिक भएको थियो ।
२०७९ सालमा महालेखा परिक्षकको कार्यालयले सार्वजनिक गरेको वार्षिक प्रतिवेदनमा समेत प्रदेश सरकारले मनोमानी रुपमा सुराकी वापत खर्च गरेको बताएको छ । मधेश प्रदेश अन्तर्गको गृह मन्त्रालयले सुराकीको नाममा रकम बुझ्दै आएकोले यस प्रकारको खर्चको औचित्य नभएको प्रतिवेदनमा उल्लेख छ ।
