जनकपुरधाम, कात्तिक ७ गते ।
धनुषाको बटेश्वर गाउँपालिका स्थित बटेश्वर बजारमा भोलि (शनिबार) कृषि, शिक्षा, स्वास्थ्य, निजामती सेवा र सुशासनजस्ता समसामयिक विषयमा गहन छलफलसहित ‘बटेश्वर मन्थन–२०८२’ हुने भएको छ।
बटेश्वर युवा संजालको आयोजनामा हुन लागेको उक्त कार्यक्रममा रक्तदान र रगत समूह परीक्षण कार्यक्रम पनि एकैसाथ सञ्चालन गरिने आयोजकले जनाएको छ। आयोजकका अनुसार तीन वटा विषयवस्तुमा मन्थन हुनेछ भने केही विषयमा विभिन्न पेशा एवं क्षेत्रमा आवद्ध व्यक्तिहरुले आ आफ्नो मन्तव्य राख्नेछन ।
मन्थनमा सहभागी वक्ता एवं कार्यक्रम संचालकहरु सबै बटेश्वर गाउँपालिकाकै रहेका छन । सरकारी सेवातर्फ बटेश्वरका युवाहरुको यात्रा : चुनौती, अवसर र आशा सत्रमा सह सचिव राम प्रकाश महतो, निजमती कर्मचारी सुरेश साह र यमनसुन्दर श्रेष्ठ वक्ता हुनेछन भने शिक्षक एवं पत्रकार दिपेन्द्र सिंहले यो सत्र संचालन गर्नेछन ।
बटेश्वरका शिक्षाको गुणस्तर र सुधारका उपाय सत्रको संचालन शिक्षक हरिनरायण दासले गर्नेछन् । यस सत्रमा बटेश्वर गाउँपालिकाका शिक्षा शाखा प्रमुख रामलाल महतो, शिक्षक रामसशकल महतो, निजामती कर्मचारी एवं शिक्षाप्रतिका चिन्तक प्रकाश निरौला र शिक्षिका लक्ष्मी कुमारी महतोले आफ्ना विचार राख्नेछन ।
बटेश्वरमा किसानका चुनौती, अवसर तथा आर्थिक सम्भावना सत्रको संचालन इन्जिनियर उदय ठाकुरले गर्नेछन् भने बटेश्वर गाउँपालिका वडा नम्बर ५ का वडाध्यक्ष शिवकरण यादव, विद्यालय एवं कृषि फार्म संचालक तथा प्याबस मधेश प्रदेश अध्यक्ष गणेश साह र किसान रेखा महतोलाई वक्ताको रुपमा राखिएको छ ।
त्यसैगरि पत्रकार शैलेन्द्र महतो क्रान्तिले बटेश्वरको दुई कार्यकालको समिक्षा मन्तव्य राख्नेछन । युवा नेता अजयकुमार राउतले विकास कस्तो हुनुपर्छ विषयमा आफ्नो मन्तव्य राख्नेछन भने आफन्त नेपालका शिक्षा अधिकृत विष्णु यादवले यो संस्थाले शिक्षामा गरेको लगानीबारे आफ्ना विचार राख्ने कार्यक्रम रहेको आयोजकले जनाएको छ । त्यसैगरि बटेश्वरको अवस्था शिर्षकमा स्थानीय सरकार विशेषज्ञ समेत रहेका सरोज कुमार महतोले आफ्ना मनत्वय राख्नेछन ।
स्थानीय युवाहरूको सक्रियतामा पछिल्लो केही वर्षयता यो कार्यक्रम दीपावली र छठ पर्वको बीचमा आयोजना हुँदै आएको छ। कार्यक्रममा बटेश्वरकै विभिन्न पेशामा आबद्ध व्यक्तिहरुले तय भएका विषयवस्तुमा आफ्ना दृष्टिकोण, धारणा एवं योजनाहरु व्यक्त गर्ने कार्यक्रमका अगुवामध्ये एक सरोज कुमार महतोले बताए ।
‘आफ्नो जन्मभूमिमा केही फरक र अर्थपूर्ण काम गर्नुपर्छ भन्ने सोचका साथ केही वर्षयता हामीले हरेक वर्ष विभिन्न कार्यक्रम गर्दै आएका हौं। यस वर्ष पनि समुदाय केन्द्रित बहस र रक्तदान लगायतका कार्यक्रम मार्फत सामाजिक चेतना फैलाउने प्रयास गरेका छौं,’ उनले भने ।
मन्थनमा गाउँपालिकाका कर्मचारी, शिक्षक, नागरिक समाजका अगुवा, बुद्धिजीवी, युवा लगायत सर्वसाधारणलाई आमन्त्रित गरिएको
कार्यक्रमका संयोजक जयकृष्ण महतोले बताए । उनका अनुसार मन्थनमा बटेश्वरको विकास, समृद्धि र रुपान्तरणका लागि गहन बहस हुनेछ ।
युवा संजालले आज अरूको लागि, भोलि आफ्नै लागि” भन्ने नाराका साथ रक्तदान कार्यक्रम पनि आयोजना गर्ने जनाएको छ। १८ वर्ष पूरा गरेका इच्छुकले रक्तदान गर्न सक्ने र रगत समूह थाहा नभएकाका लागि नि:शुल्क परीक्षणको व्यवस्था गरिएको छ।
