जनकपुरधाम, भदौ ९ गते ।
पर्सा जिल्लामा फैलिएको झाडापखाला र हैजाको जोखिम नियन्त्रण गर्न स्वास्थ्य संकट व्यवस्थापन समितिको आइतबार बसेको बैठकले स्वास्थ्यकर्मी अभाव हुन नदिन नयाँ निर्णयहरू गरेको छ।
निमित्त प्रमुख जिल्ला अधिकारी (प्रजिअ) सुमनकुमार कार्कीको अध्यक्षतामा बसेको बैठकले अत्यावश्यक बाहेकका स्वास्थ्यकर्मीको विदा रोकिने र आवश्यक परे स्थानीय तहका स्वास्थ्यकर्मीलाई केन्द्रिकृत रूपमा तोकिएका स्वास्थ्य संस्थामा खटाउन सकिने निर्णय गरेको हो।
बैठकमा मधेस प्रदेशका स्वास्थ्य तथा जनसंख्या मन्त्री सत्रुधन प्रसाद सिंहको पनि उपस्थिति थियो।
निमित्त प्रजिअ कार्कीले झाडापखाला र हैजा नियन्त्रणका लागि माइकिङ, घरदैलो कार्यक्रम र सचेतना अभियान तत्कालै सञ्चालन गर्ने तयारी भएको बताए। साथै, आवश्यक औषधि तथा सामग्री व्यवस्थापनका लागि सबै निकायसँग सहकार्य गर्ने निर्णय गरिएको उनको भनाइ थियो।
त्यसैगरी, संघीय र प्रदेश सरकारबाट प्राप्त थप जनशक्ति तथा स्रोत साधनलाई ‘पुल’ खडा गरेर जिल्ला स्वास्थ्य संकट व्यवस्थापन समितिमार्फत वितरण, व्यवस्थापन र अनुगमन गर्ने व्यवस्था मिलाइएको छ।
फैलिरहेको महामारीको ‘सोर्स अफ इन्फेक्सन’ पहिचानका लागि अनुसन्धान सम्बन्धित स्थानीय तहले गर्ने र त्यसका लागि आवश्यक प्राविधिक सहयोग प्रदेश तथा संघीय स्वास्थ्य मन्त्रालयले उपलब्ध गराउने निर्णय समेत बैठकले गरेको छ।
