जनकपुरधाम, भदौ ९ गते ।
पर्साको वीरगञ्जमा हैजाको प्रकोप फैलिँदै जाँदा नारायणी अस्पतालमा बिरामीको चाप दिनानुदिन बढिरहेको छ ।
पछिल्ला तीन दिनमा मात्र ६० भन्दा बढी झाडापखालाका बिरामी अस्पताल भर्ना भएका छन् । तीमध्ये तीन जनाको मृत्यु भइसकेको छ भने ४४ जना अझै उपचाररत छन् ।
अस्पताल प्रमुख डा. चुमनलाल दासका अनुसार धेरै बिरामी सामान्य अवस्थामा नभई गम्भीर लक्षणसहित आइपुगेका छन् ।
“कतिपय बिरामी बेहोस भएर, जलवियोजनका कारण अति जटिल अवस्थामा आएका छन् । यसले साधारण झाडापखालाको भन्दा गम्भीर स्थिति देखाउँछ,” उनले भने ।
चिकित्सकहरूका अनुसार आलस–तालस, अत्यधिक धड्कन, आँखा पल्टाउने, रक्तचाप घट्ने जस्ता लक्षणसहित बिरामी अस्पताल आइरहेका छन् ।
“हिजो मात्रै नयाँ वार्डमा २२ बेड थप्नुपर्यो । अझै २५ बेडको तयारी भइरहेको छ,” अस्पताल प्रमुख डा. दासले भने
नारायणी अस्पतालमा उपचाररत बिरामीमध्ये आधाभन्दा बढीको र्यापिड डाइग्नोस्टिक टेस्ट (RDT) पोजिटिभ देखिएको छ । चिकित्सकहरूले यसलाई हैजाको ‘आउटब्रेक’ भन्दै समुदायस्तरमै संक्रमण फैलिएको पुष्टि गरेका छन् ।
वीरगञ्ज महानगरपालिका–११, १२, १३ र १६ नम्बर वार्डमा प्रकोप फैलिएको छ । विभिन्न अस्पतालमा १६१ भन्दा बढी बिरामी उपचाररत छन् ।
विज्ञहरूका अनुसार खानेपानी पाइपमा ढलको दूषित पानी मिसिँदा हैजा फैलिएको आशंका छ । इपिडिमियोलोजी तथा रोग नियन्त्रण महाशाखा (EDCD) का अनुसार संकलित नमुना परीक्षण गर्दा खानेपानीमा इकोलाई जीवाणु पाइएको छ ।
“घना बस्ती भएकाले रोग फैलने दर उच्च छ । समयमै नियन्त्रण गर्न नसकिए महामारीका रूपमा फैलिने खतरा छ,” पूर्व प्रमुख डा. दासले चेतावनी दिए ।
संक्रमण बढेपछि वीरगञ्ज महानगरपालिकाले विद्यालय पठनपाठन स्थगित गरेको छ । साथै महानगर क्षेत्रमा पानीपुरी, चाट, चटपटे लगायतका सडक खाद्यपदार्थ बिक्रीमा रोक लगाइएको छ ।
नालामै राखिएका पाइप लिक भएर ढल मिसिने सम्भावना देखिएकाले खानेपानी प्रणाली परीक्षणका लागि ११ स्थानबाट नमुना संकलन गरी काठमाडौंको राष्ट्रिय जनस्वास्थ्य प्रयोगशालामा पठाइएको छ ।
