जनकपुरधाम, साउन २ गते ।
जनकपुरधाममा फेरि एकजना संचारकर्मीमाथि आक्रमण भएको छ ।
जनकपुरधाम उपमहानगरपालिका—१२ स्थित कुवारामपुरमा रहेको गौशालामा रिर्पोटिङ्ग गर्न पुगेका संचारकर्मी कुन्दन मिश्रमाथि आक्रमण भएको हो ।
समाजिकफिड डटकम अनलाइनका क्यामेराम्यान मिश्रमाथि गौशालामा अज्ञात व्यक्तिले ढुंगा प्रहार गरेका थिए ।
समाजिक फिडकी पत्रकार आशा अधिकारीसँगै मोटरसाइकल चढेर उनी समाचार संकलनका लागि पुगेका थिए ।
जनकपुरका वकिलहरुले यहाँका पत्रकारहरुमाथि आक्रमण गरेको ७ औँ दिनमै यो दोस्रो घटना भएको छ ।
‘गाई बाँधेको स्थानतर्फ भिडियो खिच्न जाँर्दै गर्दा ममाथि बेस्सरी ढुंगा प्रहार भयो । मैले टाउकोबाट हेल्मेट निकालेको थिइन, ढुंगा प्रहारबाट हेल्मेट फुटेको छ । चोट पनि लागेको छ,’ संचारकर्मी कुन्दनले भने । मिश्रले लगाएको स्मार्ट वाच समेत फुटेको छ ।
ज्यानै जानेगरी ती अज्ञात व्यक्तिले टाउकोमा ढुंगा प्रहार गरेको कुन्दनको भनाइ छ । यद्दपी हेल्मेट लगाएकै कारण उनको ज्यान भने जोगिएको छ ।
घटना स्थलमा नचिनेका केही युवाको समुह देखेपछि कुन्दन त्यहाँबाट फुत्किएका थिए ।
समाजिक फिड टिमले उक्त घटनाबारे सोधखोज गर्दा नगर प्रहरीले गोलमटोल जवाफ दिए । घटनास्थलमा रहेको सिसिटिभीले काम नगरेको नगर प्रहरीले बताएको छ ।
समाचार संकलनमा अवरोध गर्दै आफुमाथि आक्रमण गर्ने व्यक्तिलाई कारबाही गर्न पत्रकार मिश्रले माग गरेका छन ।
पछिल्लो समय जनकपुरधाम सहित मधेश प्रदेशमै पत्रकारमाथि आक्रमणको घट्ना बढेको छ ।
