जनकपुरधाम, साउन २८ गते ।
पाकिस्तानी सेनाका प्रमुख आसिम मुनिरले केही दिनअघि भारतलाई परमाणु आक्रमणको चेतावनी दिएका केही दिनमै प्रधानमन्त्री शहबाज शरीफले पनि कडा भाषामा धम्की दिएका छन्।
इस्लामावादमा आयोजित एक कार्यक्रममा बोल्दै शरीफले भारतलाई चेतावनी दिँदै भने— भारतले पाकिस्तानको पानी रोक्ने धम्की दिएमा, आफूहरूले पनि भारतलाई पाकिस्तानको एक थोपा पानी लिन नदिने छन्।
उनको भनाइमा, “यदि तिमी हाम्रो पानी रोक्ने कुरा गर्छौ भने याद राख, पाकिस्तानबाट एक थोपा पानी पनि पाउने छैनौ।”
शरीफले थप चेतावनी दिँदै भने, “यदि यस्तो धम्की र व्यवहार फेरि दोहोरियो भने हामी त्यस्तो सबक सिकाउनेछौं कि तिमी आफैं आफ्नो कान पक्रिन बाध्य हुनेछौ।”
भारतले २३ अप्रिलमा जम्मु–कश्मिरको पहलगाममा आतंककारीद्वारा नाम र धर्म सोधेर हिन्दू पर्यटकको हत्या भएको घटनाको योजना पाकिस्तानले गरेको आरोप लगाउँदै सिन्धु जल सम्झौता रद्द गरेको थियो। यसअघि सेनाप्रमुख मुनिरले भारतले पानी रोक्ने हो भने बाँधमा परमाणु आक्रमण गरेर भत्काइदिने चेतावनी दिएका थिए। भारतले हालसम्म यसबारे कुनै प्रतिक्रिया दिएको छैन।
