जनकपुरधाम, साउन १४ गते ।
साउन ४ गते जनकपुरको जिरोमाइलस्थित गेस्टहाउसमा घटेको घटनाले सबै योजना ध्वस्त पार्यो। सीसीटीभीमा देखिएअनुसार, राति करिब ९:५० बजे एक युवक र एक युवती गेस्टहाउस पुगेका थिए। केही समयपछि उक्त युवक गम्भीर घाइते अवस्थामा भवनबाट खसेका थिए, जसको उपचारको क्रममा मृत्यु भयो। ती युवक महोत्तरी गाउँपालिका-१ पर्साका ३२ वर्षीय विमलेश यादव हुन्।
त्यसै दिन दिउँसो १२ बजे जुलीलाई प्रहरीले पक्राउ गर्यो। उनी हत्या अभियोगमा अहिले धनुषा प्रहरीको हिरासतमा छिन्। प्रारम्भिक अनुसन्धानमा उनले विमलेशबाट लामो समयदेखि यौन, मानसिक र आर्थिक शोषण हुँदै आएको बताएकी छन्।
तीन वर्ष पुरानो सम्बन्ध
तीन वर्षअघि फेसबुकमार्फत ‘शनि झा’ को नामले परिचय दिँदै विमलेश जुलीसँग नजिकिएका थिए। उनी सशस्त्र प्रहरीबाट भगौडा भएका, विवाहित र दुई सन्तानका पिता रहेको पछि खुलेको थियो। उनले फोटो र भिडिओमार्फत जुलीलाई ब्ल्याकमेल गर्दै शारीरिक सम्बन्ध कायम गर्न दबाब दिने गरेका थिए।
परिवारले थाहा पाएपछि प्रहरीमा पटक-पटक उजुरी गरिए पनि कारबाही ठोस रूपमा अघि बढेन। कहिले मिलापत्र, कहिले फाइल नै नदेखिने अवस्था प्रहरीको कमजोरीको रूपमा देखिएको छ।
समस्या समाधान नभएपछि…
जुलीको परिवारका अनुसार उनले आत्महत्याको प्रयास दुईपटक गरेकी थिइन्। मोबाइलजस्तै ‘ह्याङ’ भएको भन्दै मानसिक तनावमा थिइन्। परिवारले प्रहरीमा भर्ना भएर नयाँ जीवन सुरू गर्नुपर्छ भनेर हौस्याएका थिए। तर, घटनाको अघिल्लो दिन विमलेशले गेस्टहाउसमा बोलाएका थिए। रातभर गेस्टहाउसमा बसेपछि बिहान उनको मृत्यु भयो।
जबरजस्ती करणीको मुद्दा किन चलाइएन ?
मधेस प्रदेशका मुख्य न्यायाधिवक्ता सुरेन्द्र महतोका अनुसार सहमतिमा भएका सम्बन्धका भिडिओ प्रयोग गरेर ब्ल्याकमेल गरी जबरजस्ती यौन सम्बन्ध राख्नु बलात्कारकै श्रेणीमा पर्छ। यस्तो मुद्दामा मिलापत्र मान्य हुँदैन। तर यो घटनामा प्रहरीको गम्भीर लापरवाही देखिएको छ।
धनुषा र महोत्तरी दुवै जिल्ला प्रहरी कार्यालयहरूले अघिल्लो उजुरीको प्रक्रिया स्पष्ट गर्न सकेका छैनन्। अनुसन्धानको नाममा कागजातहरू नपाएको भन्दै उम्कने प्रयास भइरहेको छ।
प्रहरी कहाँ चुकेको हो ?
प्रहरीको समयमा नपुगेको हस्तक्षेप, उजुरीपछि पनि कारबाही नगर्नु, दोषीलाई छोडिदिनु र पीडितको अवस्थालाई गम्भीर रूपमा नलिनुले अन्ततः एउटा हत्या हुन पुगेको देखिन्छ।
जुली अहिले कर्तव्य ज्यानको अभियोगमा थुनामा छिन्। उनका परिवारले उनलाई प्रहरीमा भर्ती भएर आत्मनिर्भर बन्ने सपना थियो भने, उनी आफैं पनि प्रहरी बन्ने प्रेरणाले अगाडि बढेकी थिइन्। तर, प्रहरीबाटै अपेक्षित न्याय नपाएपछि अन्ततः उनले ‘हात उठाउनु’ परेको दाबी गरिरहेकी छिन्।
उकालो डटकमको सहयोगमा
