जनकपुरधाम, जेठ १ गते ।
“Strengthening Meaningful Youth Engagement for Girls Standing Strong” भन्ने नाराका साथ जनकपुरमा आयोजित दुईदिने प्रदेशस्तरीय विमर्श बुधबार सम्पन्न भएको छ।
यूनीभर्सल पिरियडिक रिभ्यु (UPR) प्रतिवेदन प्रक्रियासम्बन्धी उक्त विमर्श मधेश प्रदेशमा १३ र १४ मे २०२५ का दिन होटल वेलकम, जनकपुरमा सम्पन्न भएको हो।
कार्यक्रमको उद्देश्य युवाहरूलाई मानव अधिकारका विषयमा सशक्त बनाउँदै उनीहरूको आवाज नीति निर्माण तहसम्म पुर्याउन रहेको थियो।
विमर्शमा अपाङ्गता भएका युवा, यौनिक तथा लैङ्गिक अल्पसंख्यक समुदाय, तथा सीमान्तकृत वर्गका मधेश प्रदेशको ८ वाटै जिल्लाका २० जना युवा प्रतिनिधिहरूले सहभागिता जनाएका थिए।
कार्यक्रममा सहभागीहरूमध्ये धेरैले आफ्नो समुदायभित्र भोगेका समस्या, चुनौती र अवसरबारे अनुभव साटासाट गरेका थिए। कार्यक्रममा प्रदेश युवा सञ्जाल, मधेश प्रदेशका अध्यक्ष माे• नइम राईनले युवाहरूको नीति निर्माण प्रक्रियामा सार्थक सहभागिता सुनिश्चित गर्न यस्ता विमर्शहरू प्रभावकारी हुने धारणा राखेका थिए।
उनले भने, “युवा मात्र परिवर्तनका संवाहक होइनन्, उनीहरू नै नीति निर्माणका केन्द्रमा पुग्नुपर्छ। विशेषतः सीमान्तकृत तथा फरक पहिचान भएका युवाहरूको आवाज मुखरित गर्नु अहिलेको आवश्यकता हो।”
कार्यक्रमको सचिवालय युवालया (Yuwalaya) ले सम्हालेको थियो भने, महिला सेवा संस्था, नेपाल (WSI) प्राविधिक साझेदारका रूपमा रहेका थिए।
PLAN International को सहयोग तथा देशभरका ३० भन्दा बढी संघसंस्थाको सहकार्यमा कार्यक्रम सम्पन्न गरिएको थियो।
युपिआर मधेशले मानव अधिकारको प्रवर्द्धनमा युवाको सक्रिय सहभागिता सुनिश्चित गर्दै नेपालमा मात्र नभई अन्तर्राष्ट्रिय स्तरमा समेत युवाको आवाज बुलन्द गर्दै आइरहेको छ।
