जनकपुरधाम । एचआइभीको क्षेत्रमा कार्यरत्त रहेका संस्थाको सेवाको तेस्रो चरणको अनुगमन सम्पन्न गरिएको छ ।
एचआईभीको क्षेत्रमा स्पर्श नेपाल, सुनौलो विहानी समाज, प्रादेशिक अस्पतालमा रहेको एआरटी सेन्टरमा उपचार गराईरहेका तथा एनए+पिएन संस्थाले कार्य गरिरहेकोमा उनीहरुको सेवाबाट सेवाग्राही संतुष्ट छन अथवा छैनन् त्यसको अनुगमनका लागि युएनएड्सको सहयोगमा सिएलएम (सामुदायिक नेतृत्वको अनुगमन) परियोजना सञ्चालन भएको थियो ।
स्पर्श नेपाल धनुषाका फोकल पर्सन कुलदिप साहले यौन व्यवसायमा लागेका, लागूऔषध सेवनकर्ता, एचआईभी संक्रमितहरुलाई आफुहरुले सेवा दिँदै आएकोमा आफुहरुको सेवा कस्तो रहेको त्यसको अनुगमन गरिएको बताए ।
अनुगमनका लागि सेवाग्राहीकै समुदायबाट एक/एक जना गरि चारजना पिअर लिडर पठाएर सेवाग्राही प्रतिक्रिया फारम भराएर सेवाको अनुगमन गरिएको हो ।
यस परियोजना अन्तर्गत ३ सय ४ जनासँग सर्वेक्षण गरिएको हो । यौनिक तथा अल्पसंख्यक समुदायका ६३, सुईद्वारा लागूऔषध लिने ७० जना, महिला यौनकर्मी ९४ जना र एचआईभी संक्रमित ७७ जनासँग सर्वेक्षण गरिएको फोकल पर्सन साहले बताए ।
यो अनुगमनको क्रममा सुईद्वारा लागूऔषध प्रयोगकर्ता समुहबाट यौन रोगको उपचार सहज रुपमा हुनुपर्ने सँगै हेपाटाइटिसको उपचार उपलब्ध हुनुपर्नेलगायतका सुझाव दिएका थिए । त्यस्तै, एचआईभी संक्रमित समुदायबाट भाइरल लोडको रिपोर्ट समयमा आउनुपर्ने, पौष्टिकआहारको उपलब्धता, रोजगारको प्रबन्ध, यातायात खर्चको उपलब्धतासँगै कावा समुहका बालबालिकाहरुका लागि थप सहयोग हुनुपर्ने सरोकारवालाहरुसँग माग गरेका छन् ।
यस्तै, महिला यौनव्यवसायीको तर्फबाट यौन पेशालाई कानूनी मान्यता दिनुपर्ने, आवश्यक परेको बेला कानूनी सहायता र आयमुलक तालिमको व्यवस्था मिलाईदिनुपर्ने सुझाव दिएका हुन् । त्यस्तै, यौनिक तथा अल्पसंख्यक समुदायबाट सचेतनामूलक कार्यक्रम सँगै हार्मोनल सपोर्ट सेवा जनकपुरधाममै उपलब्ध हुनुनपर्ने सुझाएका छन् ।
स्पर्श नेपालको तथ्यांक अनुसार धनुषामा यस जिल्लाका र जिल्ला बाहिरका गरि कुल ५६३ जना एचआईभी संक्रमित उपचार गराईरहेका छन् ।
सोमबार जिल्ला समन्वय समितिका अध्यक्ष राजनन्दन मण्डलको अध्यक्षतामा भएको बैठक सम्पन्न भएको हो । उनले यसका लागि जिल्लाका सबै पालिकासँग समन्वय गर्ने बताए ।
जनकपुरधाम उपमहानगरपालिकाका स्वास्थ्य शाखा प्रमुख विजय साहले एचआईभी संक्रमित समुदायहरुका लागि यातायात खर्च पालिकाबाट उपलब्ध गराउने प्रतिबद्धता जनाए । यस्तै, प्रदेश जनस्वास्थ्य प्रयोगशालाका शाखा प्रमुख संतोष यादवले आफूहरुसँग किटको उपलब्धता भएकाले भाइरल लोडको रिपोर्ट समयमै उपलब्ध गराउन सक्षम रहेको बताए ।
