जनकपुरधाम, जेठ १७ गते ।
मधेश प्रदेशको सत्तारुढ गठबन्धनबाट बाहिरिएका नेकपा एमाले, माओवादी लगायतका दललाई नयाँ सरकार गठन गर्न हम्मे परेको छ । नेकपा एकीकृत समाजवादी पार्टीको दोहोरो भूमिकाले नयाँ सरकार गठन हुने वा सरोज कुमार यादव नेतृत्वको वर्तमान सरकार नै टिकिरहने टुंगो लाग्न सकिरहेको छैन । मधेस प्रदेशका मुख्यमन्त्री सरोजकुमार यादवले विश्वासको मत लिने तयारी गरिरहेका छन भने प्रतिपक्षी दलको सक्रियता सुस्त देखिएको छ ।
अहिले जसपा नेपाल नेतृत्वको प्रदेश सरकारमा एकीकृत समाजवादी सामेल छ । अहिलेकै सरकारलाई टिकाइराख्न मुख्यमन्त्री यादवलाई जसरी पनि नेकपा एस, लोसपा र कांग्रेसको साथ चाहिएको छ । अर्कोतर्फ एमाले, माओवादी र जनमत पार्टीको सरकार बनाइराख्न समेत विपक्षी गठबन्धनलाई लोसपा वा नेकपा एसको साथ अनिवार्य चाहिएको छ ।
स्रोतका अनुसार कांग्रेस र लोसपा नेपाललाई समेटेर मधेस प्रदेशमा जसपा नेपाल नेतृत्वकै सरकारलाई निरन्तरता दिन पहल भइरहेको छ ।
कांग्रेस सभापति शेरबहादुर देउवाले निजी निवास बूढानीलकण्ठमा बुधबार बोलाएको प्रतिपक्षी दलको बैठकमा जसपा अध्यक्ष उपेन्द्र यादवले मधेश सरकार टिकाउन कांग्रेस र लोसपाको साथ मागेका छन ।
देउवाले बोलाएको प्रतिपक्षी दलहरूको बैठकमा सत्तारुढ नेकपा एकीकृत समाजवादीका अध्यक्ष माधवकुमार नेपाल पनि सहभागी भएका थिए । त्यहीबेला उपेन्द्रले मधेश सरकार टिकाउन सहयोग मागेको कांग्रेसका एकजना शीर्ष नेताले बताए । ‘पछिल्लो राजनीतिक परिस्थितबारे छलफल भयो । केन्द्र सरकारको विषयमा पनि चर्चा भयो । उपेन्द्रजीले मधेशमा मिलेर जाऊँ भन्नु भएको छ,’ ती नेताले भने ।
यता माधव नेपालसँगै बूढानीलकण्ठ पुगेका एकीकृत समाजवादीका नेता मेटमणि चौधरीले भने सामान्य चियापान र देउवासँग सन्चो बिसन्चोबारे मात्रै कुरा भएको दाबी गरे ।
मधेशमा २३ प्रदेश सांसदसहित नेकपा एमाले पहिलो दल छ । कांग्रेसका २२, जसपा नेपालका १६, जनमतका १३, लोकतान्त्रिक समाजवादीका ९, माओवादीका ८ र एकीकृत समाजवादीका ७ सांसद छन् ।
१०७ सदस्यीय प्रदेश सभामा सरकार बनाउन ५४ सांसदको समर्थन आवश्यक पर्दछ । यदि यही जेठ २८ गतेसम्म जसपा नेता सरोज यादवले विश्वासको मत नलिए अर्को सरकारको विकल्पमा जानुपर्छ ।
यदि कांग्रेस, जसपा, लोसपा र एकीकृत समाजवादी मिले ५४ सांसदसहित बहुमत पुगेर यादव नेतृत्वको सरकार ढल्नबाट जोगिन्छ । तर एकीकृत समाजवादी केन्द्रीय सरकारमा भएकाले उपेन्द्रलाई सहयोग गर्ने नगर्ने अन्योल छ । यद्यपि नेकपा एसका अध्यक्ष नेपाल केन्द्रको सत्ता गठबन्धनसँग असन्तुष्टि बोकेर बसेका छन् । एमाले सहितका दलको नयाँ सरकार गठनमा नेकपा एसले साथ दिएन भने विपक्षी गठबन्धनको नयाँ सरकार बनाउने योजना चुर हुनेछ ।
मधेशमा हाल जसपाबाट सरोजकुमार यादव मुख्यमन्त्री छन् । त्यहाँ नेकपा एमाले, नेकपा माओवादी केन्द्र र जनमतसहितले समर्थन फिर्ता लिएकाले यादवले जेठ २८ गतेसम्ममा विश्वासको मत लिइसक्नु पर्ने संवैधानिक व्यवस्था छ । अशोक राईले गत वैशाख २३ केन्द्रमा जसपा नेपाल विभाजन गरेर नयाँ दल बनाएका छन् । यस्तोमा मधेशबाट पनि जसपाका केही सांसद नयाँ दलमा जाने सम्भावना छ । मधेशका सबै १६ सांसद अहिलेसम्म उपेन्द्र यादवको जसपा नेपालमै रहेर नयाँ दलमा सनाखत गरिसकेका छैनन् ।
