जनकपुरधाम, वैशाख १३ गते ।
जनकपुरधाम उपमहानगरपालिकामा लामखुट्टे नियन्त्रणमा लाखौँ रुपैँया अनियमितता भएको पाइएको छ । आर्थिक वर्ष २०७९र८० मा जनकपुरधाम उपमहानगरपालिकाले लामखुट्टे नियन्त्रणको लागि १९ लाखभन्दा बढी खर्च गरेको थियो ।
तीमध्ये १३ लाखभन्दा बढी रकम अनियमितता भएको महालेखा परिक्षकको कार्यालयले जनाएको छ । महालेखाले उपमहानगरपालिकाको कार्यालयलाई पठाएको प्रारम्भिक प्रतिवेदनमा अनियमितता भएको १३ लाख ४१ हजार ३२६ रुपैयाँ असुल उपर गर्न भनेको छ। गत आर्थिक वर्षमा लामखुट्टे नियन्त्रण गर्न उपमहानगरपालिकाले कुल १९ लाख ३ हजार ५२ रुपैयाँ खर्च गरेको छ ।
०७९ भदौ ३१ गते स्वास्थ्य कार्यालय धनुषाबाट लामखुट्टे नियन्त्रणको लागि छिडकाउ सम्बन्धमा लेखिएको पत्रमा डेंगु रोग नियन्त्रणको लागि छिडकाउ कार्यक्रम सञ्चालन गर्न प्रति १ लिटर मालाथियोनमा ८ लिटर डिजल लाग्ने उल्लेख छ।
उक्त पत्र उपमहानगरपालिकाले असोज २ गते दर्ता गरी सोही निर्देशानुसार १ लिटर डिजलमा १२५ ग्राम मालाथियोन मिसाई छिडकाउ गर्ने निर्णय गरेको थियो । उपमहानगरले प्रति लिटर रु. ७१२ का दरले २६८ लिटर मालाथियोन खरिद गरी रु. १९०८१६ भुक्तानी दिएको थियो।
नियमानुसार १ लिटर मालाथियोनमा ८ लिटर डिजलका हिसाबले जम्मा २ हजार १४४ लिटर डिजल लाग्ने देखिएकोमा उपमहानगरपालिकाले त्यसको ३ गुणाभन्दा बढी डिजेल खरिद गरेको महालेखापरीक्षकको कार्यालयले जनाएको छ।
‘स्रेस्ता परीक्षण गर्दा पालिकाले देहायका भौचरबाट लामखुट्टे नियन्त्रणको लागि तत्कालीन प्रति लिटर डिजलको औषत दर रु. १७३ रहेकोमा कुल ९ हजार ८९७.३३ लिटर डिजल खरिद गरी रु. १७ लाख १२ हजार २३६ रुपैयाँ भी आयललाई भुक्तानी दिएको छ । यसरी पालिकाले आवश्यकता भन्दा १३ लाख ४१ हजार ३२६ रुपैयाँको ७ हजार ७५३.३३ लिटर डिजल बढी खरिद गरी भुक्तानी दिएको छ। यसरी नर्म्सभन्दा बढी खर्च लेख्ने पदाधिकारीलाई जिम्मेवार बनाई असुल गर्नुपर्छ,’ प्रतिवेदनमा उल्लेख छ ।
