जनकपुरधाम, वैशाख १३ गते ।
धनुषाको औरही गाउँपालिकामा प्रदर्शन गरिरहेका स्थानीय र प्रहरीबीच झडप भएको छ । औरही गाउँपालिका १ पौडेश्वरस्थित सडक बन्द गरी टायर बालेर प्रदर्शन गरिरहेका स्थानीय र प्रहरीबीच भएको हो ।
जिल्ला प्रहरी कार्यालय धनुषाका प्रवक्ता डिएसपी रञ्जन अवाका अनुसार अवस्था नियन्त्रणमा लिन प्रहरीले ९ सेल अश्रुग्यास प्रहार गरेको छ । झडपमा परी सशस्त्र प्रहरीका दुइ र नेपाल प्रहरीका एकजना घाइते भएका छन् ।
करिब १० दिनअघि यहीँ वडाका दुईजना युवती बेपत्ता भएका थिए । तर प्रहरीले भने हंसपुर नगरपालिकाका दुईजना फरक समुदायका युवकसँग उनीहरु प्रेममा परि भागेको बताइरहेको छ । युवतीका आफन्त र स्थानीयले भने दुबैजना युवतीको अपहरण भएको दावी गरिरहेको छ ।
हराइरहेकी युवतीहरुको खोजतलास नगरेको भन्दै प्रहरी विरुद्ध नाराबाजी गर्दै आज विहानैदेखि स्थानीय प्रदर्शनमा उत्रिएका थिए । विहान प्रहरीले सम्झाई बुझाइ गरेपछि उनीहरुले आन्दोलन छोडेर घर फर्केको प्रहरीले जनाएको छ ।
तर पछि दिउँसो फेरि उनीहरु सडक अवरुद्ध गरी टायर बालेर प्रदर्शन गर्न थालेपछि प्रहरीले अवस्था नियन्त्रणमा लिने प्रयास गरेको थियो । त्यस क्रममा प्रदर्शनकारी र प्रहरीबीच झडप भएको थियो ।
प्रहरीमाथि ढुंगामुढा प्रहार गर्दै प्रदर्शनकारीले प्रहरीको गाडी समेत तोडफोड गरेको डिएसपी अवाले बताए । उनका अनुसार अवस्था नियन्त्रणमा लिन प्रहरीले ९ सेल अश्रुग्यास प्रहार गरेको छ । दुईजना युवतीलाई भगाएको घटनामा प्रहरीले पाँच जनालाई थुनेर अपहण तथा शरिरबन्धक मुद्दा समेत चलाइ युवतीहरुको खोजतालास जारी रहेको डिएसपी अवाको भनाई छ ।
प्रहरीका अनुसार हंसपुर नगरपालिकाका दुईजना युवकसँग दुबैजना युवती प्रेमसबन्धमा थिए । उनीहरु आपसी सहमतीमै भागेको प्रारम्भिक अनुसन्धानमा देखिएको जिल्ला प्रहरी कार्यालय धनुषाले जनाएको छ ।
