जनकपुरधाम, वैशाख १२ गते ।
धनुषाका पत्रकार विनयकुमार यादवको मोटरसाइकल दुर्घटनामा मृत्यु भएको छ ।
आज विहान करिब ४ बजे मिथिला नगरपालिका-६ स्थित ढल्केवरमा आफैले चलाएको मोटरसाइकल दुर्घटनामा उनको मृत्यु भएको प्रहरीले जनाएको छ ।
धनुषाधाम नगरपालिका ५ घर भएका उनको आज बिहान उपचारको क्रममा प्रादेशिक अस्पताल जनकपुरमा मृत्यु भएको जिल्ला प्रहरी कार्यालय धनुषाका प्रवक्ता डिएसपी रञ्जन अवाले बताए ।
उनका अनुसार ढल्केवरबाट धनुषाधाम फर्किने क्रममा आफैले चलाएको प्रदेश ०२–००६ प ३०३५ नम्बरको मोटरसाइकल अनियन्त्रित भई सडक छेउको रेलिङमा ठोक्किएर दुर्घटना भएको हो ।
उक्त दुर्घटनामा मोटरसाइकलमा पछाडी सवार भएका पत्रकार यादवका छिमेकी ३० वर्षीय लक्ष्मी नारायण यादव घाइते भएका छन् ।
प्रादेशिक अस्पताल जनकपुरमै उनको उपचार भइरहेको छ । पत्रकार यादवको शव प्रादेशिक अस्पताल जनकपुरमा राखिएको र घटना विषयमा थप अनुसन्धान गरिरहेको डिएसपी अवाले बताए ।
