जनकपुरधाम, वैशाख ६ गते ।
जनकपुरमा जलेको अवस्थामा शव बरामद भएकी महिलाले आत्म हत्या गरेको प्रारम्भिक अनुसन्धानले देखिएको प्रहरीले दावी गरेको छ । महोत्तरीको मनरासिसा नगरपालिका वडा नम्बर २ बस्ने २३ वर्षीया प्रियंका महतोको शव जलिरहेको अवस्थामा बरामद भएको थियो ।
घटनास्थलमै घाइते भेटिएकी उनकी छोरीलाई भने अस्पताल पुर्याउँदा डाक्टरले मृत घोषणा गरेका थिए । बुधबार राति करिब ९ बजेतिर
जनकपुरधाम उपमहानगरपालिका वडा नम्बर १६ कपिलेश्वर महादेव मन्दिरबाट नजिकै रहेको खेतमा महिलाको शव जलिरहेको स्थानीयले देखेका थिए ।
उनीहरुले नै शिशुलाई समेत जलेको देखेका थिए । प्रहरीलाई स्थानीयले घटनाबारे खबर गर्दै शिशुलाई तत्कालै उपचारका लागि प्रादेशिक अस्पताल जनकपुर पुर्याएका थिए । स्थानीय त्यहाँ पुग्दा भने महिलाको लुगा जलेर जिउ पोलेर मृत्यु भइसकेको थियो ।
प्रहरीका अनुसार घटनास्थलबाट महिलाको मोबाइल फोन बरामद भएको छ । त्यसका साथै जलेर हल्का बाँकी रहेको प्लास्टिकको बोतल भेटिएको र त्यसमा मट्टितेल रहेको देखिएको छ ।
धनुषाका प्रहरी प्रवक्ता डीएसपी रञ्जन अवाले घटनास्थलको प्रकृतिले आमाछोरीको हत्या वा आत्महत्या प्रष्ट नभएको बताए । ‘अहिलेसम्मको स्थिति हेर्दा आत्महत्या गरेको जस्तो देखिन्छ । अन्य मान्छेको संलग्लनता अहिलेसम्म खुेलेको छैन । हत्या भएको जस्तो प्रमाणहरु फेला परेको छैन । तापनि हामी प्राविधिक तर्फबाट पनि अनुसन्धान गर्दै छौं । त्यसबाट केही खुल्छ कि’, उनले भने ।
ससुरा फेकन महतोका अनुसार वैशाख १ गते पाखुरा दुखेको भन्दै प्रियंका उपचार गराउन भन्दै माइत गएकी थिइन् । बुधबार दिउँसो १२ बजेतिर उपचारको लागि छोरीसँगै प्रियंका जनकपुरधाम आएकी थिइन् । प्रियंकाका श्रीमान सुमित गाउँमै मजदुरी गर्छन् ।
श्रीमान–श्रीमतीबीच ठूलो मनमुटाव भएको पनि नदेखिएको दुबै परिवारको भनाइ छ । यद्दपी प्रियंकाकी माइती पक्षले भने उनको हत्या भएको दावी गरिरहेका छन् । उनीहरुले घटनाबारे निष्पक्ष अनुसन्धानको माग पनि गरेका छन् ।
