जनकपुरधाम, वैशाख ४ गते ।
मधेश प्रदेशसभामा विरोधकाबीच मुख्यमन्त्री सरोजकुमार यादवले विश्वासको मत लिने प्रयास गरेपछि जनमत पार्टीका सांसदहरुले तोडफोड गरेका छन् ।
माग सम्बाधेन नगरी मुख्यमन्त्रीले पोडियममा अगाडी उभिएर विश्वासको मत लिने प्रस्ताव गर्न थालेपछि आक्रोशित भएका जनमतका सांसदहरुले तोडफोड गरेका हुन् । उनीहरुले प्रदेशसभाका माइक, क्यामेरा र टेबल तोडफोड गरेको प्रदेशसभा सचिवालयले जनाएको छ ।
सप्तरीको राजविराजमा तत्कालीन शिक्षा तथा संस्कृतिमन्त्री समेत रहेका महेशप्रसाद यादव लगायतका सांसदहरुमाथि भएको आक्रमणको छानविनका लागि विशेष संसदीय समिती गठन गर्न माग गरिरहेको छ । तर सत्तापक्ष तयार नभएपछि जनमत पार्टीले प्रदेशसभा बैठकमा अवरोध गरिरहेको छ ।
जनमतकै सांसदहरुको अवरोधपछि दिउँसो १० मिनेटका लागि स्थगित भएको बैठक करिब सावा पाँच घण्टापछि दोस्रो पटक बसेको थियो । तर अफुहरुको माग सम्बोधन नभएको भन्दै दोस्रो पटक समेत जनमत पार्टीका सांसदले रोष्टम अगाडी उभिएर सरकार विरुद्ध नाराबाजी गरेको छ ।
पोडियम र सभामुख बसेको स्थानमा उनीहरुले तोडफोड गर्ने प्रयास गरेपछि जनमतका सांसद र मर्यादापालकबीच धकेलाधकेल हुँदै हातपात हुनेस्थिती सिर्जना भएको थियो । अवस्था तनावपुर्ण बनेपछि सभामुख रामचन्द्र मण्डलले फेरि १० मिनेटका लागि प्रदेशसभा बैठक स्थगित गरेका छन् ।
सभामुख रामचन्द्र मण्डलले प्रदेश मामिला समितीबाट छानविन समिती गठन गर्न मुख्यमन्त्री सहमत भएको भन्दै प्रदेशसभा बैठक संचालन हुनदिन आग्रह गरेका थिए । तर जनमत पार्टीले संसदीय छानविन समिती गठन गर्नुपर्ने भन्दै अडान लिएको छ ।
मुख्यमन्त्री सरोजकुमार यादवले विश्वासको मत लिन प्रदेशसभा बैठक बोलाइएको छ । एक बजे बोलाइएको बैठक करिब दुई बजे सुरु भएको थियो । तर निरन्तर बैठक अवरोध भएपछि विश्वासको मत लिन मुख्यमन्त्रीलाई हम्मे परेको छ ।
