जनकपुरधाम, चैत १६ गते ।
प्रहरीले कटुवा पेस्तोल सहित सिरहाबाट एकजनालाई पक्राउ गरेको छ ।
पक्राउ पर्नेमा सिरहा नगरपालिका वडा नम्बर २ स्थि यादव टोल बस्ने ४९ वर्षीय विजय यादव रहेको प्रहरीले जनाएको छ ।
बुधवार विजय र उनका १९ वर्षीय छोरा राजाबीच विवाद भएको थियो ।
विवादको क्रममा राजालाई उनका बुवा विजयले घरमा राखेको पेस्तोलले गोली हानदिने धम्की दिएका थिए ।
दुबैजनाबीच घरायसी विवाद भइरहेको स्थानीयले प्रहरीलाई सूचना दिएको थियो । तुरन्तै खटिएका प्रहरीले दुबैलाई सोधपुछका लागि प्रहरी कार्यालय लगेको थियो ।
त्यहाँ राजाले नै बुवा घरमा पेस्तोल राखेको सूचना प्रहरीलाई दिएको थियो ।
उनको घरमा खानतलासीको क्रममा पेस्तोल फेला परेको प्रदेश प्रहरी कार्यालय जनकपुरका डिएसपी नरेश कुमार सिंहले बताए । उनका अनुसार विजय विरुद्ध हातहतियार तथा खरखजाना मुद्दामा प्रहरीले अनुस्न्धान गरिरहेको छ ।
सिरहा जिल्ला अदालतबाट सात दिनको म्याद थप गरी प्रहरीले घटनाबारे थप अनुसन्धान गरिरहेको डिएसपी सिंहले बताए ।
