जनकपुरधाम, चैत १० गते ।
पहाडमा आइतवार र तराई मधेशमा सोमवार होली पर्व मनाइँदै छ । तर जनकपुरमा भने मंगलवार वा बुधवार मनाउनुपर्ने बहस चलेपछि अन्यौलता सिर्जना भएको छ ।
मिथिला माध्यमिकी परिक्रमा यात्रीले अन्तरगृह परिक्रमा गरेको भोलिपल्ट मिथिला क्षेत्रमा होली खेल्ने धार्मिक मान्यता छ ।
परिक्रमा यात्री आइतवार जनकपुर आउँदैछन् । दिनभर रंगभूमि मैदानमा विश्राम गरेर सोमबार बिहान उनीहरुले अन्तरगृह परिक्रमा गर्नेछन् । धार्मिक चलनअनुसार त्यसको भोलिपल्ट मंगलबार होली पर्व मनाउनुपर्ने हो ।
तर जनकपुरमा एउटा वर्गले आइतबार, मंगलबार र बिहीबार माछामासु खाँदैनन् । कतिपय खानेहरुका पनि घरमा भने यी तीनदिन माछामासु पाक्दैनन् । त्यस्ता वर्गले बुधवार जनकपुरमा होली खेल्नुपर्ने तर्क गरिरहेका छन् ।
होली निर्धारित दिनभन्दा पछि सार्न खोजिएको जनकपुरमा यो पहिलोपटक होइन । अन्तरगृह परिक्रमा जनकपुर घुमेको भोलिपल्ट आइतबार, मंगलबार वा बिहीबार पर्ने बेलामा भने यहाँ यसअघि पनि होली पर्व अनुकूल (माछामासु खाने) दिन सार्ने गरिएको छ ।
यसैबीच जनकपुरधाम उपमहानगरपालिकाका मेयर मनोजकुमार साहले जनकपुरमा मंगलबार होली मनाइने बताएका छन् । शुक्रबार जनकपुरधाममा नर्थ साउथ कलेक्टिभसले आयोजना गरेको एक कार्यक्रममा उनले अन्तःगृह परिक्रमाको भोलिपल्ट जनकपुरमा होली मनाइने परम्परा रहेको र त्यसै परम्परालाई अनुकरण गर्दै मंगलबार होली मनाइने बताए ।
‘रक्सीमासु खानेका सबै दिन होली हुन्छ । आज पनि दारूमासु खाएर होली मनाउन सकिन्छ । तर परम्परागत होली त मंगलबार नै मानिने हो,’ उनले भने ।
