जनकपुरधाम, चैत ६ गते ।
सर्लाही प्रहरीले प्रहरीले पक्राउ गरेका दुईजना भारतीय डाँकाले नेपालमा समेत डकैतीको योजना बनाइरहेको खुलेको छ ।
भारतको विभिन्न स्थानमा डकैती लगायतका ७ वटा अपराधिक घटनामा उनीहरुको संलग्ना समेत रहेको खुलेको जिल्ला प्रहरी कार्यालय सर्लाहीका प्रवक्ता डिएसपी दिपेन्द्र पंजियार थारुले बताए ।
उनका अनुसार बरहथवा नगरपालिका ६ स्थित मगर टोलमा डेरा लिई बसेका दुबैजनाले नेपालमा पनि डकैतीको योजना बनाइरहेको विशेष सूचनापछि सादा पोषाकका प्रहरी खटिएका थिए ।
सोमवार राति साढे ८ बजेतीर डेरामा गइ खानतलासी गर्दा भारत बिहार सितामढी थाना सैयारा ग्राम बस्ने २८ वर्षीया सन्नी कुमार सिंह र मोतिहारी गंगापिपरा बस्ने २४ वर्षीय जितेन्द्र कुमार राउतलाई प्रहरीले हतियार सहित पक्राउ गरेको थियो ।
उनीहरुको साथबाट एक थान म्यागजेनि, अमेरिकन पेस्तोल र सोमा लाग्ने ६ राउण्ड गोली, बरामद भएको छ । प्रहरी डेरामा पुगे लगतै जितेन्द्रले प्रहरीमाथि एक राउण्ड गोली प्रहार गरेको थियो ।
ईलाका प्रहरी कार्यालय बरहथवा र जिल्ला प्रहरी कार्यालय सर्लाहीबाट खटिएका प्रहरी टोलीले उनीहरुलाई नियन्त्रणमा लिइ थप अनुसन्धानका लागि जिल्ला प्रहरी कार्यालय ल्याउँदै थिए ।
त्यस क्रममा जितेन्द्रले भाग्ने प्रयास गरेका थिए । बसबरिया गाउँपालिका ६ पोखरीयाबाट करिब ७ सय मिटर अगाडी मलंगवा तर्फको बाटोमा गाडीबाट भाग्ने क्रममा उनलाई नियन्त्रणमा लिन प्रहरीले ५ राउण्ड फायर गरेको थियो ।
प्रहरीको दुई राउण्ड गोली जितेन्द्रको बाँया घुडा र दाहिने तिघ्रामा लागेको छ ।
घाइते भएका उनलाई प्रादेशिक अस्पताल मलंगवामा उपचार सम्भव नभएपछि थप थप उपचारका लागि जनकपुर रिफर गरिएको छ ।
पक्राउ परेका दुबैजना डाँका आरोपी भारतीय प्रहरीको मस्ट वान्टेड सूचीमा रहेका छन् । घटनाबारे थप अनुसन्धान भइरहेको डिएसपी थारुले बताए ।
