जनकपुरधाम, चैत ४ गते ।
महोत्तरीका तत्कालीन डिभिजनल वन अधिकृत हेमन्तप्रसाद साहसहित २४ जनाविरूद्ध सरकारी सम्पत्ति हानी नोक्सानी पुर्याएको अभियोगमा विशेष अदालतमा भ्रष्टाचार मुद्दा दायर भएको छ । बर्दिबासस्थित सामुदायिक वनको जग्गालाई व्यक्तिको नाममा पुर्याउन संलग्न रहेको आरोपमा शुक्रबार अख्तियार दुरूपयोग अनुसन्धान आयोगले उनीहरु विरुद्ध भ्रष्टाचार मुद्दा दायर गरेको हो।
बर्दिवास नगरपालिका १ स्थित रम्तेलडाँडा सामुदायिक वन क्षेत्रको १ रोपनी भन्दा बढी जग्गा स्थानीय लिलामणि आचार्य र कृष्ण प्रासद गौतमको नाममा दर्ता कायम गर्न डिभिजनल वन अधिकृत साह, सहायक बन अधिकृत बेचन ठाकुरसहित २४ जनाले मिलिमतो गरेको अभियोग छ ।
वनलाई व्यक्तिको जग्गा बनाएर त्यहाँ रहेका सिशौ, सखुवा, सिसौ, भिक्स र टिक जातका ठुला रुख विरुवा कटान गरेको उजुरीका आधारमा अख्तियारले छानबिन गरेको थियो। छानबिनका क्रममा त्यहाँ डिभिजन वन कार्यालय देखि नापी कार्यालय र स्थानीय जनप्रतिनिधि सम्मको मिलेमतोमा वनको जग्गालाई व्यक्तिको नाममा लगेर रूख कटान गरिएको फेला पारेको थियो।
मिलेमतोमै गलत सिफारिस तथा प्रतिवेदन तयार पारी रम्तेलडाँडा सामुदायिक वन क्षेत्रका रूखमा छापा, टाँचा गराई विभिन्न ४०६ प्रजातिका रूख कटान गरिएको अख्तियारले जनाएको छ।
अख्तियारले डिभिजन वन कार्यालय जलेश्वर, महोत्तरीका तत्कालीन सहायक वन अधिकृत बेचन ठाकुरविरूद्ध पनि भ्रष्टाचार मुद्दा दायर गरेको छ । उनी विरूद्ध पनि ११ लाख ९६ हजार ६९५ रुपैयाँ विगो माग दावी गरेको अख्तियारले आरोप पत्रमा उल्लेख गरेको छ ।
यस्तै रम्तेल डाँडा सामुदायिक वन उपभोक्ता समितिका तत्कालीन उपाध्यक्ष उमादेबी बुढाथोकी, कोषाध्यक्ष प्रेम बहादुर थापा, सचिब धन कुमारी मगर भनिने धन कुमारी, तत्कालीन सदस्यहरु उर्मिला थापा मगर र पूर्ण बहादुर सुस्लिङ्ग, महोत्तरी, बर्दिबास नगरपालिका(१ बस्ने जग्गाधनीद्वय लिलामणी आचार्य र कृष्ण प्रसाद गौतम, रम्तेल डाँडा सामुदायिक वनका उपभोक्ता एम बहादुर थापा मगर र नन्दमाया खनाल भनिने नन्दमाया क्षेत्री र सिन्धुलीको सुनकोशी गाउँपालिका(४ का रुख कटान गर्ने ठेकेदार सन्दिप नेपालीविरूद्ध पनि अख्तियारले ११ लाख ९६ हजार ६९५ रुपैयाँ विगो माग दावी गरेको छ ।
यसैगरी सव डिभिजन वन कार्यालय बर्दिवास, महोत्तरीका तत्कालीन सहायक वन अधिकृत लक्ष्मण प्रसाद यादव, फरेष्टर सन्तोष कुमार साह, वनरक्षकहरु राज किशोर झा, अजय कुमार यादव, राकेश कुमार यादव, नारायण ढुंगेल र दिलिप महतोविरूद्ध पनि भ्रष्टाचार आरोपमा मुद्दा दायर गरेको अख्तियारले जनाएको छ ।
नापी कार्यालय, बर्दिवास महोत्तरीका तत्कालीन अमिन राम दरश राउत, मालपोत कार्यालय बर्दिबास, महोत्तरीका तत्कालीन नायब सुब्बा ओम प्रकाश खड्का र बर्दिबास नगरपालिका वडा नं। १ का तत्कालीन वडा सदस्य शान्ता देवी श्रेष्ठ, बर्दिबास नगरपालिका वडा नं। १ का तत्कालीन वडाध्यक्ष चुडामणी पोखरेल र रम्तेल डाँडा सामुदायिक वन उपभोक्ता समितिका तत्कालीन अध्यक्ष शेर बहादुर राउतविरूद्धसमेत अख्तियारले मुद्दा दायर गरेको छ ।
