जनकपुरधाम, चैत १ गते ।
प्रधानमन्त्री पुष्पकमल दाहालसँग उपप्रधान एवं स्वास्थय तथा जनसंख्यामन्त्री उपेन्द्र यादवको आपत्तिजनक तस्वीर जोडेर जनकपुरका विभिन्न ठाउँमा पम्पलेट टाँसेको आरोपमा प्रहरीले दुईजनालाई पक्राउ गरेको छ ।
पक्राउ पर्नेमा जनकपुरधाम उपमहानगरपालिका—७ बस्ने पंकज झा र वडा नम्बर १ बस्ने मनिष पुर्वे रहेको प्रहरीले जनाएको छ ।
प्रहरीका अनुसार उक्त पम्पलेटमा प्रचण्डले कुकुर बाँधेको डोरी समाएको र कुकुरको टाउँकोको ठाउँमा उपप्रधानमन्त्री यादवको तस्वीर जोडिएको तस्वीर टाँसिएको छ ।
पक्राउ परेकाहरू राष्ट्रिय एकता अभियानको अभियन्ताहरू रहेको प्रहरीले जनाएको छ।
पम्पलेटमा उपेन्द्र यादवलाई गद्दार लगायतका शब्दहरु उल्लेख गरिएको छ।
घटनाबारे थप अनुसन्धान भइरहेको जिल्ला प्रहरी कार्यालय धनुषाले जनाएको छ ।
उनीहरु विरुद्ध मुद्दा चलाउने वा नचलाउने विषयमा छलफल भइरहेको धनुषाका डिएसपी रञ्जन अवाले बताए ।
