जनकपुर न्युज
वीरगञ्ज, फागुन २५ गते ।
वीरगञ्जमा हत्या गरेर गाडेको आशंकामा प्रहरीले एक शव फेला पारेको छ ।
वीरगञ्ज महानगरपालिका वडा नम्बर १३ राधेमाई नजिकको सिर्सिया नदि छेउको आर्यघाटमा खाल्डो खनेर गाडिएको अवस्थामा १२ वर्षीय दिलीप मण्डल धानुकको शव निकालेको प्रहरीले जनाएको छ ।
जिल्ला प्रहरी कार्यालय पर्साका प्रवक्ता प्रहरी नायब उपरीक्षक कुमारविक्रम थापाका अनुसार घटना शंकास्पद देखिएपछि सोधपुछका लागि दिलीपका आमाबुवालाई प्रहरीले नियन्त्रणमा लिएको छ । कसैलाई खबरै नगरी छोराको शव उनले गाडेकाले घटना शंकास्पद देखिएको प्रहरीको भनाई छ ।
अनुसन्धानको क्रममा सोधपुछका लागि दिलिपका बुवा वीरगञ्ज महानगरपालिका वडा नम्बर १२ मुर्ली निवासी शम्भु महतो धानुक र आमा सबितालाई प्रहरीले नियन्त्रणमा लिएको छ ।
बिहीबार घरकै एक कोठामा दिलीपलाई थुनेर उनका बुवाआमा ज्याला मजदुरीका लागि घरबाट निस्किएका थिए । कामबाट बिहीबार साँझ घर फर्किँदा दिलीप कोठामै मृत अवस्थामा भेटिएपछि डरले कसैलाई थाह नदिई अटोरिक्सामा शव राखेर घाटमा लगेर गाडेको बुबा शम्भुले स्वीकार गरेका छन् ।
दिलीप लागूपदार्थको कुलतमा फसेको र अरूको घरघरमै पसेर मोबाइल लगायतका सामान चोरेर हैरान पार्न थालेपछि आफूहरू कामका लागि बाहिर जाँदा दिलीपलाई कोठामै थुनेर जाने गरेको बुबा दिलीपले प्रहरीसमक्ष बयान दिएका छन् ।
दिलीपको शवलाई पोस्टमार्टमका लागि वीरगन्जस्थित नारायणी अस्पतालमा राखिएको छ । पोस्टमार्टम रिपोर्ट आएपछि मात्र बालकको मृत्युको यकिन कारण खुल्ने र त्यसको आधारमा प्रहरी अगाडि बढ्ने प्रहरी नायब उपरीक्षक थापाले बताए ।
