जनकपुर न्युज
जनकपुरधाम, फागुन २१ गते ।
नेपाली कांग्रेसका सभापति शेरबहादुर देउवाको अथक प्रयासका बाबजदु वर्तमान संघीय सत्ता गठबन्धन विघटन नजिक पुगेको छ ।
आइतवार राति नेकपा एमाले, नेकपा (माओवादी, रास्वपा र जनता समाजवादी पार्टी (जसपा) बीच नयाँ गठबन्धन बनाएर सरकार निर्माण गर्ने सहमती भएको छ ।
कुनै नाटकीय परिवर्तन नभए नयाँ गठबन्धन सम्भवत : आजै घोषणा हुने सम्भावना रहेको माओवादीका एक नेताले जनकपुरन्युजलाई बताए ।
ती नेताका अनुसार प्रधानमन्त्रीमा माओवादी अध्यक्ष पुष्पकमल दाहाल प्रचण्डलाई नै निरन्तरता दिनेगरी ती दलहरुबीच सहमती भएको हो ।
माओवादीको तर्फबाट प्रधानमन्त्रीसमेत रहेका अध्यक्ष पुष्पकमल दाहाल प्रचण्डसहित उपाध्यक्ष नारायणकाजी श्रेष्ठ, उपमहासचिव वर्षमान पुन, एमालेको तर्फबाट अध्यक्ष केपी शर्मा ओलीसहित उपाध्यक्ष विष्णु पौडेल र महासिचव शंकर पोखरेल, रास्वपा सभापति रवि लामिछाने र जसपा अध्यक्ष उपेन्द्र यादवले आइतवार राति नयाँ गठबन्धनको सरकार बनाउने सहमती गरेका हुन् ।
यसैबीच आज विहान ८ बजे बस्ने भनिएको सत्ता गठबन्धनको निर्धारित बैठक समेत स्थगित भएको छ ।
केही बेरमा वर्तमान गठबन्धनको बैठक स्थगित गरेर प्रधानमन्त्री प्रचण्डले एमालेसहितका दलहरूको बैठक बोलाएका छन् ।
माओवादी एमालेसहित रास्वपा र जसपालगायत दलहरूको बैठक केही बेरपछि बाललुवाटारमा बस्नेछ ।
उक्त बैठकमा नयाँ सरकारमा मन्त्रालय, राजनीतिक नियुक्ति लगायतका विषयमा छलफल हुने नाम खुलाउन नचाहेका ती माओवादी नेताको भनाइ छ ।
